محتاجلكم
في حياتي احس بقربكم
محتاج اشوفلي
ضحكه حلوه في وشكم
واسمعلي دعوه بحسكم
مش راح اشوف
في يوم فراقي
دموع عنيكم
و الحزن في وجوه بعضكم
فرصه خدوها و ادوهالي
وانا لسه وشي في وشكم
محتاجلكم

طالب

جيد ولا جدا
ولا امتياز
اي حاجه تقول
باني شخص مجاز
اي حاجه تقول
انشالله بالمقبول
لاهتفرق ابقا وزير
او اني اعيش بهلول

متجوز و معايا عيال

متجوز و معايا عيال
و موظف علي قد الحال
ساكن اخر الخط بعيد
شايل ابونيه سكه حديد
يوماتي بصحا الصبحيه
الساعه سته الا شويه
و اجري الحق للاكس يفوت
وارجع اخر الليل بالقوت
علي رجليا او متشال
ما انا متجوز عندي عيال

المدير

طلع علينا المدير
و قال بصيغه قسم
بأن هذا العمل
لازم في يوم يتحسم بفتح الحاء
قلناله في تقدير
شد الخدود و ابتسم
خلصنا خدله نشان
و وسطنا احنا اتقسم

حادي بادي

حادي بادي كرنب زبادي
امشي من السكه دي ولا دي
امشي والاقي المايله اعدلها
ولا اذا مالت انا اكملها
ولا ارجع و بظهري اديلها
و كأنها مافاتتش قصادي
امشي من السكه دي ولا دي
حادي بادي كرنب زبادي

شجره توت

علي بيتنا يوم ما وعيت
من صغري شجره توت
بفرح بيوم طرحها
و احزنله لما يفوت
خرجت يوم و رجعت
عالارض مالاقتهاش
باعو الخشب بفلوس
والذكريات ببلاش

انا و ضميري

انا و ضميري اثنين
دايما في حاله حرب
حاولت يوم اقتله
موت نفسي ضرب
انا و ضميري اثنين
لا واحد ولا عشره
و مستحيل نتفق
وان طالت العشره
انا و ضميري حاولنا
ان نكون اصحاب
مقبلش يبقا صديق
ولا حب نبقا اغراب

لحمه بشر

مين يشتري لحمه بشر
ارخص و اكتر
من الجاموس و من البقر
مين يشتري لحمه بشر
مشويه طازه
ولسه نازله من اللهب
تحبيش بلاد بره العجب
من سن يوم
لأي عمر من الزمان
عراقي او لبناني كان
و بكره جايلك مالسودان
مين يشتري لحمه بشر
من ايد شيفات الامريكان
اتجمعو و طلعولك وجبتك
صندوق خشب
يوصل لعندك كل يوم
من غير تعب
وافتحو وانت و نصيبك
يطلع ابوك يطلع اخوك
او اي شخص يكون حبيبك
لا تنزعج
و اياك في يوم ينأح ضميرك
انهرضه اديك بتاكل
واهو بكره ياكلك حد غيرك